عين الغـزال وعيـن خلّـي تشابـه نظراتها من صابته راح صيد امـس |
شعر الهدب ورموشها شبـه غابـه فيها حور سلهامهـا يفتـح النفـس |
شربـي معانـاتـه وزادي عـذابـه بعده بـرى حالـي وقربـه يونّـس |
ريـح المـوده والغـلا فـي ثيابـه لبسه يغـازل قامتـه حيـن يلبـس |
ذوقـه يبيّـن رقتـه فـي خطـابـه والصوت ناعم كنّ في لكنتـه همـس |
الله عطـاه مـن الحـلا واعتنـابـه يمشـي بخطواتـه دلـع ويتغطـرس |
غـار الجمـال وراح يعلـن عتابـه والحسن يصفق راحة الخمس بالخمس |
ان غاب غاب الكـلّ لحظـة غيابـه وليا حضر في خاطري غابت الشمس |
رسمـه وهندامـه وطرحـة نقابـه يسلب لبيب القلب سحـره ويهـوس |
حارت مشاعر مهجتـي عنـد بابـه والحب تحمس جمرته خافقي حمـس |
للثقـل بصمـه فـي محيّـا جنابـه والغنج له كرسي مرصّـع ومجلـس |
بنـت لهـا بالعـز صيـت ومهابـه لو شافها شيـخ العدالـه يوسـوس |
جمالهـا حـرّك بقلـبـي صبـابـه امشي مع العالـم وفكـري يهوجـس |
هنـي مـن يقضـي بقيّـة شبـابـه في قربها تمضـي سنينـه ولا حـس |
قلبي سرح فـي حبهـا والتهـا بـه هي ريحة انفاسي وهي مهجتي بـس |
جمر الغضـى بالقلـب زاد التهابـه من سبّته زاد الجوى بـي وعسعـس |
شوقه غرز فـي خافقـي سـم نابـه واهديتلـه قلـب ٍ جديـد ومقرطـس |
قلت اسمعـي يابنـت حولـك رقابـه قالت نعم بالحيل ربعي بنـي عبـس |
قلت الـذي حبـك وضيّـع صوابـه قالت غرام البعد خير ٍ مـن اللمـس |
قلـت الـذي يناخـك يلقـى ثوابـه قالت تحصل تمـر لكـن بـلا دبـس |
قلت الشقى والظيـم راسـي نوابـه قالت ابـد محشـوم مثلـك ينومـس |
قلت ارحمي والشيب راسـي غدابـه قالت معي خلك ذكي وافهـم الـدرس |
قلت ابشري يا عـزّ نجـد وهظابـه قالت هلابـك عـدّ مالريـح نسنـس |
يارب في ساعـة صفـا واستجابـه انك تصون احبـاب قلبـي وتحـرس |
