ليلى تمكن حبهـا بوجدانـي

ليلى سواها مانـي ابمتمنـي




ما جاك يا ابن الملوح جانـي

ما جننك يا قيـس بيجننـي



اعشقها انا وتقوللي تهوانـي

يا رب فيها لا تخيـب ظنـي



ابيهـا تعشقنـي وتتمنانـي

ابيهـا تتعودنـي وتدمـنـي



وابيها لا من جيتها تنصانـي

وتكاد من زود الوله تاكلنـي



والحب ما تسألني عن عنواني

ولا ديني ولا اصلي ولاسنـي



الحب ما هو كلمتن بلسانـي

ولا قصيـد اولفـه وابـنـي



الحب صعب توصفه قيفانـي

لو كل يوم اكتب شعر واغني



الحب ما هو بس ما تنسانـي

الحب ما تصبر دقيقة عنـي



الحب ما يفنى ولا لـه ثانـي

ما هو تشكل ابيض اسود بني



الحب عمرك تدفعـه مجانـي

الحب سحر ومثل مس الجني



الحب يجري دمك مع شرياني

انته انا كنك وانا انتـه كنـي



الحب اما جرح منـه تعانـي

والا نعيم تعيش بـه متهنـي



ويمكن احبك وانت ما تدناني

الحب ما هو شرط منك ومني